لڑکی کی عصمت ریزی‘ متاثرہ کے نام پر موظف تحصیلدار نے خطیر رقم اینٹھ لی

محبوب نگر4-جنوری(اعتمادنیوز)محبوب نگر میں عصمت ریزی کے الزام میں رورل پولیس نے بی ٹیک طالب علم کو گرفتار کرلیا۔ رورل انسپکٹر پولیس وینکٹیشورلو کے مطابق کرستان پلی کے ساکن یادگیری موظف تحصیلدار کے مکان میں ایک لڑکی کام کرتی تھی۔ موظف تحصیلدار کے پڑوسی بی ٹیک طالب علم راکیش نے لڑکی کو بہلا پھسلا کر اپنے مکان بلایا اور اس کی عصمت ریزی کی۔ اس بات کا علم ہونے پر موظف تحصیلدار نے نوجوان کے والدین سے 5 لاکھ روپئے ادا کرنے کا تقاضہ کیا بصورت دیگر پولیس میں شکایت درج کروانے کا انتباہ



دیا۔ طالب علم کے والدین نے دیڑھ لاکھ روپئے ادا کئے اور معاملہ کو رفع دفع کردیا۔ رقم کی وصولی کے بعد یادگیری نے لڑکی کو کام پر سے نکال دیا۔ یہ لڑکی تنہا تھی۔ مکان سے نکال دینے پر وہ ریلوے اسٹیشن میں روتے ہوئے پائی گئی۔ وہاں موجود آٹو ڈرائیورس نے لڑکی کو II ٹاؤن پولیس کے حوالے کیا۔ II ٹاؤن پولیس نے لڑکی کو آئی سی ڈی ایس کے حوالے کیا۔ لڑکی سے تفصیلات حاصل کی گئیں اور راکیش‘ اس کے والدین اور موظف تحصیلدار کے خلاف مقدمہ درج کیا گیا۔ وینکٹیشورلو نے بتایا کہ خاطیوں کو بہت جلد گرفتار کرلیا جائے گا۔